A. Kərimlinini sözlərinə görə, seçiləcək mahnı üçün dekabrın əvvəllərindən xarici bəstəkarlara müraciət edilib: “10-a yaxın bəstəkar artıq “Eurovision-2010”da oxunacaq mahnı yazmaq üçün bizə müraciət edib. Həmin bəstəkarların hamısı əcnəbilərdir. Ancaq onların sırasında Araş yoxdur”.

Nümayəndə heyətinin rəhbəri “Eurovision-2010” müsabiqəsində Azərbaycanı məhz Səfurə Əlizadənin təmsil edəcəyi barədə xəbərləri təkzib edib: “Əgər bizim əvvəlcədən kimisə göndərmək məqsədimiz olsaydı, o zaman heç milli seçimi belə keçirməzdik və öz təmsilçimizin adını açıqlayardıq. Milli Yayım Şurası olaraq bizim öz təmsilçimizi seçib göndərmək hüququmuz var. Necə ki, TRT milli seçim keçirmədən “ManGa” qrupunun təmsilçiliyini irəli sürdü”.

APA-nın əldə etdiyi məlumata görə, Azərbaycan təmsilçisinin “Eurovision-2010” müsabiqəsində ifa edəcəyi mahnının müəllifləri müəllifləri artıq məlumdur. “Telenor Arena”da ifa ediləcək mahnının bəstələnməsi ABŞ-ın tanınmış prodüseri Timbalanda həvalə olunub. Prodüser-bəstəkarın Castin Timberleykin tanınmasında müstəsna xidmətləri var. Hazırda isə Timbaland tanınmış müğənni Rihanna ilə çalışır.